Պարտքերի հավաքագրման «AM»-ի թիմը միլիոնավոր դրամներ է հետ ստացել իր հաճախորդների համար

2016 թվականից «AM» իրավաբանական ընկերությունում գործող Պարտքերի հավաքագրման ծառայությանը վստահվել է հետ գանձել 110.000.000 դրամ:

Առանց երկար դատական պրոցեսների, առանց շատ ժամանակ ու մեծ ֆինանսներ ծախսելու մի շարք շինարարական, ապահովագրական, վարկային, տուրիստական և այլ ընկերություններ «АM»-ի այս նոր ծառայության օգնությամբ կարողացել են վերադարձնել իրենց հասանելիք գումարների մի զգալի մասը: Ընդհանուր միջին վիճակագրությամբ տարբեր հաճախորդների համար հնարավոր է եղել հետ գանձել պարտքերի 60-ից 90 տոկոսը: Այսպիսով, մի քանի ամիսների ընթացքում այս ծառայությունը կարողացել է միլիոնավոր դրամներ հետ ստանալ իր հաճախորդների համար:

Լարված տնտեսական իրավիճակում ակնհայտորեն շատացել են ֆինանսական պարտականությունները ուշացնող և չկատարող անհատներն ու ընկերությունները: Միևնույն ժամանակ, մեր շատ հաճախորդներ չեն ցանկանում կոպտորեն դադարեցնել գործնական ու մարդկային հարաբերությունները վճարումների ժամկետները խախտած իրենց գործընկերների հետ: Պարտքերի հետգանձման մեր թիմին հաջողվել է բանակցային, խորհրդատվական, մինչդատական և այլ իրավական գործիքների միջոցով գտնել արդյունավետ ու շահավետ լուծումներ: Միայն ամենաչարամիտ պարտապանների պարագայում, երբ սպառվել են գումարի գանձման բոլոր այլ խելամիտ եղանակները, «АМ» թիմը ստիպված է եղել գումարները բռնագանձել դատական կարգով՝ լրացուցիչ նյութական բեռ դնելով իրենց պարտքերը վճարելուց ամեն կերպ խուսափողների վրա:

Լատվիայից ժամանած մասնագետը ներկայացրեց Եվրոպական Միության ապրանքային նշանների մեկ հայտով գրանցման առանձնահատկությունները

   Եվրոպական ապրանքային նշանների հավատարմատար Ալինա Բոգդանովիչան ոլորտի հայ մասնագետներին ներկայացրեց Եվրոպական Միության ապրանքային նշանների գրանցման գործընթացի հիմնական առանձնահատկությունները:

  «AM» իրավաբանական ընկերության գլխամասային գրասենկայում կայացած սեմինարին ներկա գտնված ոլորտի առաջատար մասնագետներին, արտոնագրային հավատարմատարներին և փաստաբաններին ներկայացվեցին նաև Եվրոպական Միության միասնական ապրանքային նշանի գրանցման գործընթացում կատարված վերջին փոփոխությունները, որոնք հնարավորություն են տալիս մեկ հայտով գրանցել ԵՄ անդամ բոլոր պետություններում գործող ապրանքային նշան:

    Սեմինարը իրականացվեց  «Զ. Մանուկյան և գործընկերներ» արտոնագրային բյուրոյի նախաձեռնությամբ, որը Հայաստանում գործող մտավոր սեփականության ոլորտում մասնագիտացված ամենափորձառու և հեղինակավոր կազմակերպություներից մեկն է և արդեն երկար տարիներ հանդիսանում է «AM» Իրավաբանական ընկերության վստահելի գործընկերը:

Իրավական խնդիրների լուծման նոր հնարավորություններ «AM» իրավաբանական ընկերության միջազգային գործընկերների միջոցով

    «AM» իրավաբանական ընկերությունն ընդլայնում է իր հաճախորդներին մատուցվող ծառայությունների տարածքն ու շրջանակը՝ կնքելով փոխգործակցության նոր համաձայնագրեր իրավաբանական ծառայություններ մատուցող օտարերկրյա կազմակերպությունների հետ:

    «AM» իրավաբանական ընկերության նոր գործընկերն է Ուկրաինայում գործող «Первая Украинская Долговая Компания» գործակալությունը, որի արհեստավարժ թիմը մասնագիտացած է Ուկրաինայի տարածքում պարտքերի հետ գանձման ուղղությամբ մատուցվող բոլոր ծառայությունների մասով: Այս համագործակցության արդյունքում «AM» իրավաբանական ընկերության հաճախորդները կկարողանան լուծել չվճարված գումարային պարտավորությունների հետ գանձման իրենց խնդիրներն Ուկրաինայում  ինչպես արտադատական ճանապարհով, այնպես էլ դատական և դատական ակտերի հարկադիր կատարման բոլոր փուլերում:

  Եվս մեկ համագործակցության հուշագրի կնքմամբ «AM» իրավաբանական ընկերությունը համագործակցելու է հնդկական IP TRACTUS մտավոր սեփականության ոլորտում գործող կազմակերպության հետ: Որակյալ մասնագիտական թիմն ապահովում է ապրանքային նշանների գրանցման ողջ գործընթացն ու դրան առնչվող ցանկացած հարցի լուծումը՝ ներկայացնելով նաև հաճախորդի շահերը հնդկական Մտավոր սեփականության գործակալությունում:

Փորձ Է արվում նսեմացնել Երվանդ Քոչարի ստեղծագործական ժառանգությունը

   

  Վերջին շրջանում զարմանալի է տեսնել «Ժողովրդական ճարտարապետ Ռաֆայել Իսրայելյան» հասարակական կազմակերպության հայտարարությունը «Զվարթնոցի արծիվ» քանդակի հետ կապված, որով փորձ է արվում կասկածի տակ դնել Երվանդ Քոչարի համահեղինակությունը: 

  Հայտարարության հեղինակներն իրենց խոսքն ավելի լսելի դարձնելու համար օգտագործել են վիրավորանքներ և վարկաբեկող արտահայտություններ, ինչի հետ կապված Երվանդ Քոչարի թանգարանի և ժառանգների իրավունքների պաշտպանությունը ստանձնել է «AM» իրավաբանական ընկերությունը: 

    «Զվարթնոցի արծիվ» քանդակը հրապարակման (տեղադրման) պահից հայտնի է եղել որպես Երվանդ Քոչարի և Ռաֆայել Իսրայելյանի համահեղինակությամբ ստեղծված աշխատանք, ինչը հանրահայտ փաստ է և հաստատվում է ինչպես բազմաթիվ գրքերով, տպագիր մամուլի հոդվածներով, վկայություններով, այնպես էլ պատմության և մշակույթի հուշարձանների ռեեստրի վկայագրով, որոնց համաձայն քանդակի ճարտարապետն է Ռաֆայել Իսրայելյանը, իսկ քանդակագործը` Երվանդ Քոչարը: «Հեղինակային իրավունքի և հարակից իրավունքների մասին» ՀՀ օրենքի 7-րդ և 8-րդ հոդվածների համաձայն քանդակի նկատմամբ սահմանվում է երկու արվեստագետների համահեղինակության իրավունքը: 

    Երվանդ Քոչարի թանգարանը, ինչպես նաև ժառանգները երբևէ չեն ներկայացրել «Զվարթնոցի արծիվը» որպես բացառապես Քոչարի աշխատանք և միշտ բարեխղճորեն նշել են երկու համահեղինակներին: Պետք է նշել, որ Ռաֆայել Իսրայելյանը և Երվանդ Քոչարն իրենց կենդանության օրոք ևս որևէ կերպ չեն վիճարկել այդ փաստը:

   «Զվարթնոցի արծիվ» ուղենիշ կոթողով յուրաքանչյուրս կարող էինք հպարտանալ որպես երկու մեծագույն արվեստագետների համագործակցության արդյունք, մինչդեռ այսօր, օգտագործելով երկու մեծերի անունները, փորձ է արվում վնասել նրանց թողած մշակութային ժառանգությանը: 

    «AM» իրավաբանական ընկերությունը պաշտպանելու է Երվանդ Քոչարի թանգարանի և ժառանգների հեղինակային իրավունքները, պատիվն ու արժանապատվությունը և հետամուտ է լինելու, որ նմանատիպ հրապարակումներն անհետևանք չմնան նաև իրավական հարթությունում:

Հայաստան-Կիպրոս իրավաբանական համագործակցության նոր սկիզբ

Հայաստան-Կիպրոս իրավաբանական համագործակցության նոր սկիզբ

Այսօր Հայաստան է ժամանել Կիպրոսում գործող առաջատար իրավաբանական ընկերության՝ DADLAW ընկերության հիմնադիր Դեմետրիոս Դեմետրիադեսը: AM իրավաբանական ընկերությունում տեղի է ունեցել հյուրի հանդիպումը ընկերության կառավարիչ բաժնետեր Գրիգոր Մինասյանի և գլխավոր իրավախորհրդատու, փաստաբան Նարինե Սարգսյանի հետ: DADLAW իրավաբանական ընկերությունն ունի տասնյակից ավել հաճախորդներ, որոնք ցանկություն ունեն բիզնես գործունեություն ծավալել Հայաստանում: Ուստի, երկու խոշորագույն իրավաբանական ընկերությունների միջև համաձայնություն է ձեռք բերվել համագործակցել Հայաստանում և Կիպրոսում ներդրումների կատարման իրավաբանական աջակցության նպատակով:
Հաշվի առնելով, որ AM իրավաբանական ընկերությունը միաժամանակ հանդիսանում է Աթենքում գործող Հանրային իրավունքի եվրոպական կազմակերպության հյուրընկալող կողմը Երևանում, վերոնշյալ համագործակցությունը ևս մեկ քայլ է հայ-հունական վաղեմի բարեկամության զարգացման ուղղությամբ:

«AM» իրավաբանական ընկերությունը պաշտպանելու է անվաչմշկորդ Լևոն Աբգարյանի շահերը

Մի քանի ամիս առաջ հանրային լայն քննարկման առարկա դարձավ Երևանում չմուշկներ վարելով հայտնի դարձած Լևոն Աբգարյանի բնակարանի պատմությունը, որը բազմակողմանի լուսաբանվեց զանգվածային լրատվության միջոցների կողմից: Վերջինս բազմիցս հայտարարել է, որ դարձել է խարդախության զոհ և զրկվել է իրեն պատկանող բնակարանի սեփականության իրավունքից:
Կարևորելով կորպորատիվ սոցիալական պատասխանատվությունը և պահպանելով հեռուստաընկերությամբ հնչեցրած խոստումը՝ AM իրավաբանական ընկերությունը շարունակում է օգնել Լևոն Աբգարյանին իր օրինական շահերի պաշտպանության գործում:
Նշված խնդրի հետ կապված հարցուվել էր քրեական գործ և AM իրավաբանական ընկերությունը անվճար իրավաբանական օգնություն էր ցուցաբերում Լևոն Աբգարյանին նշված քրեական գործի շրջանակներում:
Այժմ արդեն հարցը տեղափոխվել է նաև քաղաքացիական դատավարության դաշտ և դատարան ներկայացվել է հայցադիմում՝ մեր վստահորդին իր բնակարանից վտարելու պահանջով:
AM իրավաբանական ընկերության գլխավոր իրավախորհրդատու, փաստաբան Վանիկ Մարգարյանը պաշտպանելու է Լևոն Աբգարյանի շահերը դատարանում նաև այս քաղաքացիական գործի շրջանակներում՝ հիմնավորելով սեփականության իրավունքի դադարման ապօրինությունը:

Եվրասիա ավագ դպրոց-վարժարանի աշակերտները AM իրավաբանական ընկերությունում

«AM» իրավաբանական ընկերությունը հյուրընկալեց «Եվրասիա» ավագ դպրոց-վարժարանի իրավաբանական հոսքի աշակերտներին: Կազմակերպված ընդունելության ընթացքում աշակերտները շրջայց կատարեցին գլխամասային գրասենյակում, ծանոթացան ընկերության անձնակազմի, նրանց աշխատանքի և ընկերության կառուցվածքի հետ: 

Հանդիպման ընթացքում ընկերության գլխավոր իրավախորհրդատու, փաստաբան Լևոն Սահակյանը դպրոցականներին ներկայացրեց ըկերության ստեղծման պատմությունը, կարևորեց իրավունքի տեսության ուսումնասիրությունը, ծանոթացրեց իրավաբանական տարբեր ճյուղերին առնչվող առանձնահատկություններին, ներկայացեց իրավաբանի և փաստաբանի առավելությունները, լիազորությունները, ինչպես նաև օրինակներ բերեց սեփական փորձից: 

Մեր ըկերությունը, հաշվի առնելով դպրոցականների մասնագիտության ընտրությունը և ապագա իրավաբաններին աջակցության անհրաժեշտությունը, ակտիվորեն ներգրավված է մասնագիտական ու կրթական միջոցառումներում և խրախուսում է երիտասարդների հետաքրքրությունը իրավաբանի մասնագիտության նկատմամբ:

«AM» իրավաբանական ընկերությունը համագործակցում է Ռուսաստանի երկու առաջատար իրավաբանական ընկերությունների հետ

AM իրավաբանական ընկերություն

«AM» իրավաբանական ընկերությունը կնքել է  համագործակցության հուշագրեր Ռուսաստանի երկու առաջատար «Ռուսիչ» եւ «BRC» իրավաբանական ընկերությունների հետ: 

Ընկերության մամուլի ծառայությունից հայտնում են, թե սույն համագործակցությունը թույլ կտա ամրապնդել ընկերության դիրքերը իրավաբանական ծառայությունների գլոբալ շուկայում եւ լավագույնս պաշտպանել իր հաճախորդների շահերը Հայաստանի սահմաներից դուրս: