Փնտրում ենք վրացերեն լեզվին տիրապետող իրավաբան

    Ընկերությունն աշխատանքի է հրավիրում վրացերեն լեզվին տիրապետող իրավաբանի, ով կարող է զբաղվել Թբիլիսիում գործունեություն իրականացնող «AM» իրավաբանական ընկերության հաճախորդի շահերի պաշտպանությամբ: Ցանկալի է նաև անգլերեն լեզվի իմացությունը: Քանի որ հնարավոր է որոշակի աշխատանքների իրականացման անհրաժեշտություն նաև Վրաստանի տարածքում, այդ պատճառով տեղի փաստաբանական գործունեության իրականացման արտոնագրի առկայությունը նախընտրելի է:

     «AM» իրավաբանական ընկերության մի քանի հաճախորդներ արդեն իսկ բիզնես գործունեություն են ծավալել Վրաստանում, և այդ կապակցությամբ ընդլայնվում են նաև մեր ծառայությունները վրացական շուկայում: Ծառայությունների ծավալի մեծացմանը զուգահեռ անհրաժեշտություն է առաջացել համալրել մեր ընկերության ինչպես իրավաբանական, այնպես էլ վարչական թիմը: Այդ նպատակով խնդրում ենք ուղարկել ձեր ինքնակենսագրականները info@am.am էլեկտրոնային հասցեին կամ զանգահարել մեր երևանյան գրասենյակ՝ 060 44 26 26 հեռախոսահամարով:

Նոր գործընկեր Իրանի Իսլամական Հանրապետությունում

    «AM» իրավաբանական ընկերության բաժնետեր Վանիկ Մարգարյանը և գլխավոր իրավախորհրդատու Նարինե Սարգսյանը հյուրընկալեցին Իրանի ամենափորձառու առաջատար իրավաբանական ընկերություններից մեկը հանդիսացող Karimi & Associates Law Firm-ի ներկայացուցիչներին, այդ թվում՝ կառավարիչ տնօրեն Անուշիրվան Քարիմիին: 

      Հանդիպման արդյունքում երկու ընկերությունների միջև կնքվեց համագործակցության հուշագիր, ինչը հնարավորություն կտա որակյալ մասնագետների միջոցով լուծել մեր հաճախորդների հնարավոր իրավական խնդիրները Իրանի Իսլամական Հանրապետությունում:

      Հաշվի առնելով Հայաստանի ու Իրանի միջև բիզնես կապերի զարգացման ներկայիս միտումները և գնահատելով այդ հարթության վրա բարձրակարգ իրավաբանական ծառայությունների կարևորությունը՝ «AM» իրավաբանական ընկերությունն այսուհետ կարող է իր հաճախորդներին առաջարկել Իրանում բիզնես սկսելու և վարելու համար անհրաժեշտ իրավաբանական ծառայություններ, ինչպես նաև աջակցել պարսկական հնարավոր ներդրումների իրականացմանը Հայաստանում:

Իրանում մեր հաճախորդի շահերը լավագույնս պաշտպանվել են «AM»-ի գործընկերոջ հետ արդյունավետ աշխատանքի շնորհիվ

      Հարևան պետությունում մեր փորձառու և պրոֆեսիոնալ գործընկերոջ՝ «Law offices of Dr. Hassan Amirshahi and Associates» իրավաբանական ընկերության հետ համագործակցելով  կարողացել ենք դրական լուծում տալ մեր հաճախորդի բարդացած խնդրին:

   Հաճախորդը «AM» իրավաբանական ընկերությանն էր դիմել ժառանգության իրավունքի հետ կապված խնդիրների կարգավորման նպատակով: Խնդրի բարդությունն ու գործի լուծման հավանականությունը պայմանավորված էին այն հանգամանքով, որ բացակայում էին գործընթացի իրականացման համար անհրաժեշտ փաստաթղթերը և դրանք կարող էին ձեռք բերվել միայն Իրանի Իսլամական Հանրապետության պետական մարմիններից: Իրանական գործընկերոջ հետ հստակ կազմակերպված թիմային աշխատանքի արդյունքում ստացված փաստաթղթերի հիման վրա մեր ընկերության իրավաբանները կարողացան իրականացնել վստահորդի կողմից ժառանգության ընդունման համար անհրաժեշտ բոլոր գործողությունները:

Օտարերկրյա ներդրում Հայաստանում՝ «AM» ընկերության նոր գործակցությունը ForexTime-ի հետ

   Երևանում՝ «Էլիտ Պլազա» բիզնես կենտրոնում, տեղի ունեցավ աշխարհահռչակ միջազգային ֆորեքս բրոքեր ForexTime ընկերության հայաստանյան գործառնական գրասենյակի բացման պաշտոնական արարողությունը: Արարողությանը ներկա էին հայաստանյան ֆինանսական աշխարհի ներկայացուցիչներ, ինչպես նաև օտարերկրյա հյուրեր: ForexTime ընկերությունն աշխարհում Forex ոլորտի առաջատար ընկերություններից է, որը հայտնի է իր տեխնոլոգիական նորարարական լուծումներով և բարձրորակ Forex ծառայություններով: Առաջարկելով օրինակելի առևտրային պայմաններ և ծառայություններ՝ նախատեսված բոլոր մակարդակների հաճախորդների համար, ու գործելով որպես տաղանդավոր ու փորձառու մասնագետների թիմ՝ ForexTime-ն արագ դարձել է հանրահայտ ապրանքանիշ ողջ աշխարհում: Այժմ ապրանքանիշը շարունակում է իր առաջխաղացումը հայաստանյան նոր գրասենյակի բացմամբ, որը տեխնիկական աջակցություն է ցուցաբերելու ForexTime-ին:

    ForexTime ընկերության հայաստանյան գործառնական գրասենյակի կազմավորման գործընթացին իր հատուկ մասնակցությունն է ունեցել «AM» իրավաբանական ընկերությունը՝ այդպիսով հերթական անգամ աջակցելով Հայաստանում օտարերկրյա ներդրումների ավելացմանը: Նորաստեղծ գրասենյակի կողմից ակնկալվող գործունեության իրականացման ընթացքում նույնպես «AM» իրավաբանական ընկերությունը շարունակելու է հանդիսանալ կազմակերպության իրավական աջակիցն ու կայուն գործընկերը:

     «AM» իրավաբանական ընկերությունը խիստ կարևորում է մեր երկրում ներդրումների, այդ թվում՝ օտարերկրյա ներդրումների ավելացումը, և այդ ոլորտում ունենալով երկարամյա փորձ՝ հաճախ նախաձեռնում է ներդրողների մուտքը Հայաստան կամ ապահովում է բարձրորակ իրավաբանական ծառայություններ և համալիր իրավաբանական սպասարկում արդեն իսկ գործող օտարերկրյա բիզնեսներին:

Փորձ Է արվում նսեմացնել Երվանդ Քոչարի ստեղծագործական ժառանգությունը

   

  Վերջին շրջանում զարմանալի է տեսնել «Ժողովրդական ճարտարապետ Ռաֆայել Իսրայելյան» հասարակական կազմակերպության հայտարարությունը «Զվարթնոցի արծիվ» քանդակի հետ կապված, որով փորձ է արվում կասկածի տակ դնել Երվանդ Քոչարի համահեղինակությունը: 

  Հայտարարության հեղինակներն իրենց խոսքն ավելի լսելի դարձնելու համար օգտագործել են վիրավորանքներ և վարկաբեկող արտահայտություններ, ինչի հետ կապված Երվանդ Քոչարի թանգարանի և ժառանգների իրավունքների պաշտպանությունը ստանձնել է «AM» իրավաբանական ընկերությունը: 

    «Զվարթնոցի արծիվ» քանդակը հրապարակման (տեղադրման) պահից հայտնի է եղել որպես Երվանդ Քոչարի և Ռաֆայել Իսրայելյանի համահեղինակությամբ ստեղծված աշխատանք, ինչը հանրահայտ փաստ է և հաստատվում է ինչպես բազմաթիվ գրքերով, տպագիր մամուլի հոդվածներով, վկայություններով, այնպես էլ պատմության և մշակույթի հուշարձանների ռեեստրի վկայագրով, որոնց համաձայն քանդակի ճարտարապետն է Ռաֆայել Իսրայելյանը, իսկ քանդակագործը` Երվանդ Քոչարը: «Հեղինակային իրավունքի և հարակից իրավունքների մասին» ՀՀ օրենքի 7-րդ և 8-րդ հոդվածների համաձայն քանդակի նկատմամբ սահմանվում է երկու արվեստագետների համահեղինակության իրավունքը: 

    Երվանդ Քոչարի թանգարանը, ինչպես նաև ժառանգները երբևէ չեն ներկայացրել «Զվարթնոցի արծիվը» որպես բացառապես Քոչարի աշխատանք և միշտ բարեխղճորեն նշել են երկու համահեղինակներին: Պետք է նշել, որ Ռաֆայել Իսրայելյանը և Երվանդ Քոչարն իրենց կենդանության օրոք ևս որևէ կերպ չեն վիճարկել այդ փաստը:

   «Զվարթնոցի արծիվ» ուղենիշ կոթողով յուրաքանչյուրս կարող էինք հպարտանալ որպես երկու մեծագույն արվեստագետների համագործակցության արդյունք, մինչդեռ այսօր, օգտագործելով երկու մեծերի անունները, փորձ է արվում վնասել նրանց թողած մշակութային ժառանգությանը: 

    «AM» իրավաբանական ընկերությունը պաշտպանելու է Երվանդ Քոչարի թանգարանի և ժառանգների հեղինակային իրավունքները, պատիվն ու արժանապատվությունը և հետամուտ է լինելու, որ նմանատիպ հրապարակումներն անհետևանք չմնան նաև իրավական հարթությունում: